Vinnumálastofnun lýsir undrun sinni á ályktun miðstjórnar ASÍ og þeim aðdróttunum og innihaldslausu ásökunum sem þar eru settar fram í garð stofnunarinnar í tengslum við starfsemi Primera Air Nordic. Þetta kemur fram í yfirlýsingu frá Vinnumálastofnun en þar er vísað til ályktunar sem miðstjórn ASÍ sendi frá sér í dag. Vinnumálastofnun hafnar ásökununum.

„Þar er því gert skóna [sic] að Vinnumálastofnun hafi látið hjá líða að sinna lögbundnum skyldum sínum og að hún beri ábyrgð á þeim aðstæðum sem áhafnarmeðlimir hjá Primera Air Nordic og flugfarþegar eru nú í um allan heim. Fullyrðingar þessar eru með ólíkindum,“ segir meðal annars í yfirlýsingu Vinnumálastofnunar.

Frétt af mbl.is

Gagnrýna Vinnumálastofnun vegna Primera

Í ályktun ASÍ frá því í dag segir að Flug­freyju­fé­lag Íslands og Alþýðusam­band Íslands hafi und­an­far­in ár leit­ast við að stöðva ólög­lega starf­semi Pri­mera Air Nordic og fé­lags­leg und­ir­boð þess á ís­lensk­um vinnu­markaði. Þegar starf­semi fé­lags­ins stöðvist nú vegna greiðsluþrots liggi fyr­ir boðun ótíma­bund­inn­ar vinnu­stöðvun­ar frá og með 15. nóv­em­ber nk.

„Miðstjórn ASÍ harm­ar að Vinnu­mála­stofn­un hafi, þrátt fyr­ir ít­rekaðar kröf­ur FFÍ og ASÍ, látið hjá líða að nota þau laga­legu úrræði sem stofn­un­in hef­ur til þess að stöðva ólög­lega starf­semi Pri­mera Air Nordic hér landi. Af þeim ástæðum eru nú áhafn­ir þeirra flug­véla sem gerðar hafa verið út frá Íslandi strandaglóp­ar er­lend­is, fólk sem greidd hafa verið smán­ar­laun og sem rang­lega hef­ur verið skráð sem verk­tak­ar. Til viðbót­ar er fjöldi Íslend­inga nú strandaglóp­ar er­lend­is vegna gjaldþrots­ins.“

Frétt af mbl.is

Verkfall þrátt fyrir greiðslustöðvun

Vinnumálastofnun segir ASÍ hins vegar hafa verið fullkunnugt um að stofnunin hafi hvorki haft lagaheimildir né lagaleg úrræði til að hafa afskipti af starfsemi fyrirtækisins hér á landi. 

Stofnunin hafi tekið þátt í samstarfi m.a. með aðilum vinnumarkaðarins um nauðsynlegar breytingar á lögum í þeim tilgangi að sporna gegn félagslegum undirboðum. Breytingarnar hafi meðal annars snúið að því að auka eftirlitsheimildir Vinnumálastofnunar, t.d. með heimild til að leggja á sektir á fyrirtæki sem veita ekki umbeðnar upplýsingar og/eða verða við öðrum kröfum stofnunarinnar. 

„Vinnumálastofnun hafnar þeim ásökunum sem fram koma í nefndri ályktun um að hún sinni ekki lögboðnu eftirliti sínu á vinnumarkaði. Þvert á móti sinnir hún eftirlitsstarfi sínu ein sem og í samstarfi við aðra opinbera aðila auk aðila vinnumarkaðarins. 

Orðræða af þessu tagi er því miður ekki til þess fallin að styrkja baráttuna gegn ólíðandi framgöngu á íslenskum vinnumarkaði.“

Tengdar fréttir

Primera Air gjaldþrota

Arion tapaði 3 milljörðum á Primera

• Tíu milljarða kröfur á Íslandi
• Gaf engin fyrirheit um lán
• 4,6 milljónir og einn bíll í búinu
• Kröfurnar rúmir 16 milljarðar

» Fleiri tengdar fréttir

• Blogga um frétt