Tekist hefur að slökkva allan eld á Hvaleyrarbraut 39 í Hafnarfirði auk þess að hreinsa úr húsnæðinu. Slökkviliðið lauk störfum á vettvangi klukkan 19.10 í kvöld en rannsókn á tildrögum eldsins hefst í fyrramálið. Lögreglan vaktar svæðið í nótt.
Varðstjóri hjá slökkviliðinu sagði í samtali við mbl.is að loks sé aðgerðum lokið á Hvaleyrarbraut, „þó fyrr hefði verið“. Tíu slökkviliðsmenn höfðu verið að störfum á staðnum frá klukkan 13 í dag.
Þá segir hann að menn hefðu áttað sig á aðstæðunum þegar á staðinn var komið, og þá hafi verið ljóst að aðgerðir myndu taka lengri tíma en ætlað var.