Innlent | mbl | 11.5.2023 | 18:20

Sneru við úrskurði héraðsdóms

Hópslys varð á Akureyri um sumarið 2021 þegar hoppukastalinn Skrímslið tók á loft.

Landsréttur hefur fallist á beiðni um ítarlegra mat á sönnunargögnum í hoppukastalamálinu svokallaða í tengslum við slys sem varð á Akureyri árið 2021. Þetta staðfestir Ragnar Björgvinsson í samtali við mbl.is en hann er lögmaður Gunnars Gunnarssonar framkvæmdastjóra Ævintýralands Perlunnar.

Í apríl hafnaði héraðsdómur beiðni þriggja verjenda um endurmat á gögnum málsins. Verjendur sakborninga í málinu ákærðu úrskurð til Landsréttar. Í dag kváðu landsréttardómarar upp úrskurð sinn og sneru þannig úrskurði héraðsdómara á Norðurlandi eystra.

Frétt af mbl.is

Kæra úrskurð í hoppukastalamálinu

Um er að ræða atvik sem gerðist á Akureyri þann 1. júlí, 2021, þegar vindhviða reif hluta gríðarstórs hoppukastala upp frá jörðu. Fjöldi barna var þá við leik í kastalanum og flytja þurfti sex ára stúlku á gjörgæslu í kjölfar slyssins.

Var kastalinn nógu vel festur?

Í úrskurðarorðum landsréttardómara kemur fram að dómkveðja skuli tvo hæfa og óvilhalla menn til að leggja mat á þær spurningar sem greinir í matsbeiðni varnaraðila. Í matsbeiðninni var farið fram á fimm spurningar sem verjendum sakborninga þótti nauðsynlegt að fá svör við.

Þau fimm atriði sem verða eru hvort kastalinn hafi verið nægilega festur, hvort það voru nógu margar festingar, hvort hefði átt að nota innri festingar, hvort vindkviðan hafi verið yfir settum mörkum og hvort hægt hafi verið að sjá fyrir veðrinu.

Við því má búast að héraðsdómari boði brátt þinghald um nýtt mat.

Kemur ekki á óvart

Ragnar segir að úrskurður Landsréttar komi sér ekki á óvart. Mörg önnur dómafordæmi séu til sem sýna fram á að aðili sem sakaður er um refsiverðaháttsemi hafi ríkan rétt til að afla sönnunargagna.

Hoppukastalinn var í eigu Ævintýralands Perlunnar en rekstur hoppukastalans á Akureyri var í samstarfi við Knattspyrnufélag Akureyrar. Fimm einstaklingar voru ákærðir, þ.e. Gunnar Gunnarsson, tveir starfsmenn hans og tveir forsvarsmenn KA, og telst málið varða við 219. grein almennra hegningarlaga um líkamstjón vegna gáleysis.