Ríkisstjórnin boðar 212 þingmál á þingmálaskrá sinni sem þingheimi var afhent í gær. Langstærstur hlutinn er frumvörp, alls 178 talsins.
Þar af er um fimmtungurinn endurflutt frumvörp af ýmsum toga, 33 stjórnarfrumvörp sem dagaði uppi af ýmsum ástæðum á síðasta þingi.
Ívið fleiri frumvörp, eða 40 alls, eru lögð fram vegna alþjóðlegra skuldbindinga eða til frekari samræmingar, megnið innleiðingar á Evrópulöggjöf vegna Evrópska efnahagssamningsins (EES).
Ráðherrar ríkisstjórnarinnar boða jafnframt 24 þingsályktunartillögur, bæði til stefnumörkunar, áætlanagerðar á ýmsum sviðum og staðfestingar á alþjóðlegum skuldbindingum.
Loks boða ráðherrar tíu reglulegar skýrslur til Alþingis í ýmsum málaflokkum.
Nokkuð jöfn dreifing er áætluð á framlagningu mála fyrir og eftir jól, meira þó nú í haust en í vor. Nú í september er 31 mál boðað.
Í þessum sæg þingmála kennir að vonum margra grasa, en þar á meðal eru ýmis mál sem reyndust ríkisstjórnarsamstarfinu erfið á liðnu þingi.
Meira í Morgunblaðinu í dag, miðvikudag.