Eystri Rangá ber af í slöku sumri

Landssamband veiðifélaga hefur birt samantekt á veiðitölum úr laxveiðiám fyrir síðustu viku, á vefsíðu sinni angling.is. Þar stendur upp úr Eystri Rangá með rétt um 500 laxa veiðiviku. Áin er fyrsta laxveiðiáin sem rífur þúsund laxa múrinn í sumar og hafa veiðst 1.183 laxar á átján stangir. Í öðru sæti er Urriðafoss í Þjórsá með 636 laxa og vikuveiði upp 76 fiska á fjórar stangir. Aðstæður í Urriðafossi hafa verið erfiðar í sumar og Þjórsá verið mjög lituð síðustu vikur.

Miðfjarðará er að detta í fimm hundruð laxa og var vikuveiði þar í síðustu viku 186 laxar og er það besta vikan til þessa í Miðfirði. Í fjórða sæti er Ytri Rangá með 467 laxa og vikuveiði upp á 176 laxa.

Selá í Vopnafirði er komin í 374 laxa og er góður gangur í Selá. Vikuveiðin er 170 laxar og nánast tvöfaldaðist veiðin í síðustu viku.

Þegar kemur neðar á listann má sjá að harðlífið er verulegt og haft er fyrir hverjum fiski. Ljóst er þó að NA hornið er að byrja vel og eru Svalbarðsá, Hafralónsá og Hofsá allar með ágæta veiði, enda vatnsleysi ekki verið að hrjá það landssvæði. Þá virðist á sama tíma að göngur séu í meðallagi í þessar ár.

Þá eru Elliðaárnar að skila ágætri veiði miðað við aðstæður og þar hefur hlutfall stóralaxa verið hærra en oft áður.

Línur eru nú mjög að skýrast í veiðinni og ljóst að Vestur hluti landsins er að upplifa afar krefjandi og lélegt sumar. Þar virðist fara saman vatnsleysi og lélegur árgangur af smálaxi. Þó er ljóst að margar af þessum ám eiga inni góða daga þegar loks fer að rigna og fiskurinn sem í dag er kominn í árnar hressist og dreifir sér. Það mun þó tæpast breyta því að sumarið stefnir í að verða sögulegt lágmark. Hér má sjá stöðuna á fleiri ám:

Eystri Rangá    1183

Urriðafoss        636

Miðfjarðará      493

Ytri Rangá       467

Selá                374

Þverá/Kjarrá    355

Blanda             325

Elliðaár            303

Haffjarðará      256

Hofsá              232

Laxá í Aðaldal  217

Grímsá            210

Laxá á Ásum    202

Norðurá          184

Jökla               137

Víðidalsá          133

Svalbarðsá       128

Brennan           127

Hafralónsá       122

Vatnsdalsá       121

Laxá í Leir.       105

Langá              101

Flókadalsá        100

Aðrar ár hafa skilað minna en hundrað löxum í sumar.

• Blogga um frétt

Seinustu hundraðkallar sumarsins