Veiðimenn í Víðidalsá urðu vitni að skemmtilegu atviki í gær. Þeir félagar Rögnvaldur Guðmundsson og Egill Guðjohnsen voru að veiða Neðri-Valhyl. Rögnvaldur sat uppi í brekkunni hátt fyrir ofan hylinn og hafði góða yfirsýn yfir allt sem gerðist.
Egill kastaði grænni metallicu númer fjórtán og gerðarlegur hængur óð í áttina að flugunni og skoðaði hana. Veiðimaðurinn varð ekki var við þetta því hængurinn rauf ekki vatnsyfirborðið. Aftur kastaði Egill á sama stað og leikurinn endurtók sig.
Nú var farið í að skipta um flugur. Einar fimm flugur voru teknar yfir hænginn en án nokkurra viðbragða. Meðal annars var ein þeirra græn metallica á svörtum krók.
Nú ákvað Egill að fara aftur í upprunalegu fluguna. Fyrsta kastið var of langt og lenti flugan töluvert fyrir neðan hænginn. Það skipti engum togum að laxinn rauk af stað niður breiðuna og tók fluguna með offorsi á niðurleiðinni.
Eftir um fimm mínútna viðureign lak þessi fiskur af enda ekki óskastaða að fiskur taki niður undan sér. En eins og Rögnvaldur Guðmundsson sagði í samtali við Sporðaköst eftir þetta ævintýri: „Veiðimaðurinn sá aldrei hvað var að gerast og ef ég hefði ekki verið í brekkunni hefðum við ekki getað unnið á þessum fiski. Segið svo að flugan skipti ekki máli,“ sagði Rögnvaldur.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |