Sérhannað úr fyrir 30 punda klúbbinn

JS Watch Company Reykjavik og Gilbert úrsmiður hafa kynnt nýtt úr framleitt í samstarfi við og fyrir staðarhaldara í Laxá í Aðaldal, þá bræður Hermóð og Árna Pétur Hilmarssyni.

Úrið er framleitt sérstaklega fyrir 30 punda klúbb Laxár í Aðaldal og er eingöngu fáanlegt fyrir þá sem hafa öðlast inngöngu í klúbbinn með því að veiða 30 punda eða stærri lax þar.

Laxá í Aðaldal er ein þekktasta stórlaxaá landsins en árið 1942 veiddist þar einn stærsti fluguveiddi lax Íslandssögunnar; 36 punda hængur, og er áin alla jafna talin helsta stórlaxaá Íslands.

Úrið er glæsilegt, en einungis þeir sem eru skráðir í 30 punda klúbbinn í Laxá hafa rétt til að eignast það. Ljósmynd/JS

Hugmyndin að sérstöku úri tileinkuðu 30 punda klúbbi Laxár í Aðaldal kviknaði einmitt við bakka árinnar fyrir nokkrum árum þegar JS-menn voru við veiðar með Hermóði Hilmarssyni staðarhaldara.

„Úrið er byggt á grunni hins rómaða Sif NART-úrs sem er í notkun hjá þyrlu, flugsveit, köfurum og sprengjusveit Landhelgisgæslu Íslands en úrið er vatnshelt niður á 1.000 metra dýpi og hannað sérstaklega fyrir erfiðar aðstæður og hefur því verið vinsælt hjá veiðimönnum.

Bakið á úrin er útgrafið til vitnis um klúbbinn og afrekið sem viðkomandi handhafi hefur unnið. Ljósmynd/JS

Það er með fagurblárri sunburst-skífu, sjálflýsandi vísum og á bak þess er svo grafið merki 30 punda klúbbsins,“ segir Grímkell P. Sigurþórsson, yfirhönnuður og einn af eigendum JS Watch Company, þegar hann er beðinn að lýsa úrinu.

Skífuna á úrið hannaði Nils Folmer Jorgensen sem er vel þekktur stórlaxahvíslari. Nils er menntaður grafískur hönnuður með mikla reynslu og var það því vel við hæfi að fá hann til verksins.

• Blogga um frétt

Seinustu hundraðkallar sumarsins