Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
Áhugaverður moli birtist í tímaritinu Íþróttablaðið í júlí árið 1989 en Þorgrímur Þráinsson ritstýrði þá tímaritinu. Þar stendur:
„Meðal landsliðsmannanna í knattspyrnu er starfandi félag sem eingöngu litlir og sterkir liðsmenn fá inngöngu í. Félagið heitir „Kögglavinafélagið“ og er Ólafur Þórðarson stofnandi þess og kemur það fæstum á óvart. Meðlimir þessa félags þykja jaxlar hinir mestu og gorta sig af því hversu sterkir þeir séu í „sjómanni“. Allir aðrir landsliðsmenn eru vitanlega skíthræddir við kögglana enda ganga þeir um með spennta vöðva og á háhæluðum skóm þegar landsliðið undirbýr sig fyrir leiki. Pétur Arnþórsson er köggull að mati Óla Þórðar enda eru þeir báðir í „brjósthæð“ og síðast en ekki síst hefur Gunnar Gíslason fengið inngöngu í Kögglavinafélagið.“
Á meðfylgjandi mynd eru þeir Pétur Arnþórsson vinstra megin og Ólafur Þórðarson hægra megin í landsleik þetta sama sumar 1989 gegn Austurríki í undankeppni HM 1990 en Gunnar Gíslason var einnig í liði Íslands. Myndin sýnir glögglega hversu glæsilegir kögglarnir voru á velli.
Myndina tók Einar Falur Ingólfsson og birtist hún í umfjöllun um leikinn í Morgunblaðinu 15. júní 1989.
Pétur Arnþórsson lék 28 A-landsleiki fyrir Íslands hönd. Ólafur Þórðarson lék 72 A-landsleiki og skoraði 5 mörk.