Rúnar Alex Rúnarsson lék sinn fyrsta leik fyrir franska liðið Dijon sem hafði betur á móti Montpellier á útivelli í efstu deild Frakklands í fótbolta í kvöld, 2:1. Rúnar stóð á milli stanga Dijon allan leikinn.
Markmaðurinn komst vel frá sínu í leiknum og varði sex skot. Hann kom hins vegar engum vörnum við á fimmtu mínútu er Pedro Mendes kom Montpellier yfir. Júlio Tavares jafnaði leikinn á 51. mínútu og Senou Coulibaly skoraði sigurmarkið í uppbótartíma.
Næsti leikur Dijon er við Kolbein Sigþórsson og félaga í Nantes næstkomandi laugardag. Kolbeinn var ekki í hópi Nantes í fyrstu umferðinni í dag en lið hans tapaði 1:3 fyrir Mónakó á heimavelli.