Íris Björk Símonardóttir, landsliðsmarkvörður í handknattleik og leikmaður Vals, hefur leikið sinn síðasta leik en hún hefur ákveðið að hætta í handbolta. Þetta kemur fram í félagsmiðlum Valsara. Áður hafði Íris staðfest að hún myndi taka sér frí frá íþróttinni.
Íris hefur verið einn besti markvörður landsins um árabil og var í vetur með um 44 prósent markvörslu með Valsliðinu. Á síðasta tímabili, 2018-19, var hún kjörin besti leikmaður deildarinnar en þá vann Valur alla þrjá titlana sem í boði voru. Hún verður 33 ára á árinu en ásamt því að vera valin besti leikmaðurinn 2019 fékk hún einnig þá nafnbót árið 2015.