„Þeir voru í skyndisókn og mér fannst við vera ansi fámennir tilbaka. Það var einn hjá þeim frír á fjærstönginni og ég var að reyna loka á þá sendingu. Mér fannst hann hitta boltann illa þannig að hann fer á minn mann í staðinn og ég er ekki nægilega fljótur að loka á hann. Ég fæ svo hnéð á honum í hnakkann og eftir það þá byrjaði mig að svima. Við erum með tvo góða miðverði á bekknum og það besta í stöðunni var að annar hvor þeirra myndi koma inn á,“ sagði Ragnar Sigurðsson, varnarmaður íslenska landsliðsins í knattspyrnu í samtali við RÚV eftir 2:0 tap liðsins gegn Nígeríu í annarri umferð D-riðils heimsmeistaramótsins í Volgograd í dag.
Ahmed Musa skoraði bæði mörk Nígeríu í síðari hálfleik en íslenska liðið er nú í þriðja sæti D-riðils með 1 stig, líkt og Argentína en Króatía er á toppi riðilsins með 6 stig og Nígería er í öðru sætinu með 3 stig. Ísland þarf því að vinna Króata í lokaleik sínum í riðlinum, 26. júní næstkomandi í Rostov og treysta á að Nígería tapi stigum gegn Argentínu.
Ragnar þurfti talsverða aðhlynningu eftir meiðslin og var spurður að því hvort hann hefði átt að fara út af fyrr í leiknum.
„Það hefði ekki skipt neinu máli hvort ég hefði farið út af strax eftir markið eða á 65. mínútu. Ég er í góðu formi og hefði alveg getað haldið áfram en um leið og ég fór að sjá illa og finna fyrir svima þá vissi ég að það besta í stöðunni væri að fá einhvern annan inn á. Við vorum alveg með þá í fyrri hálfleik og fengum ágætis tækifæri í sóknarleiknum. Svo skora þeir mark á okkur snemma í síðari hálfleik og þá fá þeir ákveðinn byr undir báða vængi og taka yfir leikinn," sagði Ragnar að lokum.