Íþróttir | Körfubolti | mbl | 19.10.2020 | 21:09

Mótahaldi frestað fram í nóvember

Síðast var leikið í efstu deild karla hinn 6. október síðastliðinn. Ljósmynd/Þórir Tryggvason

Körfuknattleiksamband Íslands, KKÍ, hefur ákveðið að fresta öllu mótahaldi til og með 3. nóvember næstkomandi en þetta kemur fram í tilkynningu sem sambandið sendi frá sér í kvöld.

Í tilkynningunni kemur meðal annars fram að KKÍ sér fram á að leikið verði í úrvalsdeildum karla og kvenna, Dominos-deildunum, milli jóla og nýárs en deildirnar fara venjulega í vetrarfrí í desember.

Þá er ljóst að vegna landsliðsverkefni erlendis í nóvember munu íslenskir leikmenn þurfa að fara í sóttkví hér á landi og við það mun mótahald raskast enn frekar.

Yfirlýsing KKÍ:

Þeim sóttvarnaraðgerðum yfirvalda sem komið var á 7. október hefur nú verið framlengt til og með 3. nóvember, en þessar aðgerðir eru áfram mun harðari á höfuðborgarsvæðinu en utan þess.

Stjórn og mótanefnd KKÍ hafa því ákveðið að fresta öllum leikjum til og með 3. nóvember. Áfram verður fylgst með þróun mála, en vonir standa til að hægt verði að aflétta æfingatakmörkunum á höfuðborgarsvæðinu fljótlega.

Endurræsing mótahalds

Ljóst er að mótahaldi KKÍ eru nokkrar skorður settar af landsliðsgluggum FIBA í nóvember. Taka þarf tillit til þessara glugga, en ljóst er að vegna sóttkvíar landsliðsmanna mun deildarkeppni hefjast seinna en vanalega að loknum landsleikjagluggum.

Þessa dagana er unnið að “return to play“ leiðbeiningum sem unnar eru á grunni leiðbeininga FIBA og í góðri samvinnu við fræðasamfélagið og fagteymi KKÍ, en von er á því að þessar leiðbeiningar verði tilbúnar og gefnar út fyrir vikulok.

Alls hefur 298 deildar- og bikarleikjum verið frestað frá 7.10. til og með 3.11., en stóra verkefni mótanefndar verður að koma þeim leikjum fyrir svo vel sé. Leikir í Domino’s og 1. deildum hafa forgang við endurskipulagningu mótahaldsins, en sömuleiðis á eftir að skoða frekar hvað gert verður með deildarleiki í neðri deildum og yngri flokkum. Gert er ráð fyrir að leikið verði upp að jólahátíðinni, allt til 23. desember, og að leikið verður í Domino‘s deildunum milli jóla- og nýárs.

Jafnframt á eftir að skoða og ákveða hvað gert verður með þá um það bil 400 leiki í fjölliða- og fjölvallamótum sem frestað hefur verið.

Vitað er að talsvert verk er fyrir hendi þegar kemur að endurskipulagningu mótahaldsins, en ekki er enn alveg ljóst hvenær mótahaldið kemst í gang að nýju, eða með hvaða hætti það hefjist. Það verður þó tilkynnt sérstaklega þegar þar að kemur.