Njarðvík er komin í undanúrslit Íslandsmóts kvenna í körfuknattleik eftir sigur á Íslandsmeisturum Vals, 82:67, í Valsheimilinu í kvöld.
Njarðvík mætir Grindavík í undanúrslitum en hinn undanúrslitaleikurinn verður á milli bikarmeistara Keflavíkur og Hauka eða Stjörnunnar.
Jafnræði var á milli liðanna í fyrsta leikhluta en Njarðvík var yfir með tveimur stigum að honum loknum, 18:16.
Njarðvíkuliðið jók hins vegar forskot sitt í öðrum leikhluta og náði mest 13 stiga forskoti, 42:29. Endaði Njarðvík hins vegar hálfleikinn með 12 stiga forskoti.
Jana Falsdóttir fór mikinn fyrir Njarðvík í fyrri hálfleik og setti nokkra þrista.
Njarðvíkurliðið jók aðeins forskot sitt í seinni hálfleik og vann að lokum sannfærandi sigur og er komið í undanúrslit.
Selena Lott fór mikinn fyrir Njarðvíkurliðið en hún skoraði 25 stig, tók átta fráköst og gaf þrjár stoðsendingar. Hjá Val skoraði Brooklyn Pannell 14 stig, tók fjögur fráköst og gaf þrjár stoðsendingar.