Stór kolmunni og fínasta hráefni

„Við fengum um 1.100 tonn fyrsta sólarhringinn en eftir það tregaðist aflinn verulega,“ segir Albert Sveinsson, skipstjóri á Víkingi AK, en von er á skipinu til Vopnafjarðar um miðjan dag á miðvikudag með tæplega 2.500 tonna kolmunnaafla.

Um er að ræða fyrstu veiðiferð skipsins á árinu á kolmunnamiðin vestur af Írlandi, en þar er nú töluverður fjöldi íslenskra, færeyskra og rússneskra skipa að veiðum á alþjóðlegu hafsvæði.

„Við fórum frá Reykjavík 11. mars og byrjuðum veiðar þann 14. mars. Þetta er löng sigling og mig minnir að það hafi verið 660 sjómílur frá Reykjavík á miðin,“ er haft eftir Alberti á vef útgerðarinnar. Að hans sögn byrjaði veiðin mjög vel en síðan hafi kolmunninn virst ganga austur inn í írsku lögsöguna.

Stefna kolmunnans frekar austlæg

„Ég ákvað því að fara norðar en þar hafði verið ágæt veiði. Hún var þó að dala. Í næstu holum fengum við 150 og 180 tonn og þegar við hættum veiðum þá hífðum við 30 tonn eftir 13 tíma hol,“ segir Albert en hann segir skipstjórnarmenn á alþjóðlega hafsvæðinu vera nokkuð sammála um að stefnan á kolmunnanum hafi meira verið austlæg frekar en að hann hafi verið á göngu norður í áttina að færeysku lögsögunni.

„Þegar við fórum af miðunum voru menn farnir að leita að kolmunna sunnar og vonandi ber sú leit árangur,“ segir Albert og bætir við að kolmunninn sem fékkst í túrnum sé stór og fínasta hráefni.

• Blogga um frétt