Heildarafli 8% meiri í ágúst

Landaður afli íslenskra fiskiskipa í ágúst var rúm 113 þúsund tonn sem er um 8% meiri afli en sama mánuð í fyrra en þá var hann 105 þúsund tonn, að því er fram kemur á vef Hagstofu Íslands.

Þrátt fyrir að heildaraflinn ykist um 8% var verðmæti aflans á föstu verðlagi aðeins 3,5% meiri í ágúst 2019 en sama mánuð 2018.

Þá segir á vef Hagstofunnar að uppsjávarafli hafi aukist um 21% og má rekja þessa aukningu milli ára til löndunar á makríl, en hún jókst um 23%. Botnfiskafli dróst saman um 6% í ágúst og var einnig samdráttur í flatfiskafla og nam hann 35%.

Heildarafli á 12 mánaða tímabili frá september 2018 til ágúst 2019 var rúm 1.090 þúsund tonn sem er 14% minna en á árið á undan þegar heildaraflinn var 1.271  þúsund tonn.

• Blogga um frétt