Mikil eyðilegging blasir við

Óvíst er hversu margir létust í hörðum jarðskjálfta á Papúa Nýju-Gíneu á mánudagskvöld en illa hefur gengið að koma neyðaraðstoð á skjálftasvæðin vegna skemmda á vegum. Vegna jarðskjálftans, sem var 7,5 stig að stærð, hafa gas- og olíufyrirtæki neyðst til að loka starfsemi sinni sem getur haft alvarlegar afleiðingar í för með sér fyrir efnahag landsins.

Samkvæmt fréttum fjölmiðla í Papúa Nýju-Gíneu eru brýr og aðrir innviðir illa farnir. Eins íbúðarhús sem virðast hafa fallið eins og spilaborgir á skjálftasvæðunum. Flestir þjóðvegir eru ófærir vegna skriðufalla og sprungusvæða.

PNG Post-Courier dagblaðið greindi frá því í gær að 30 hefðu látist en í dag segir í frétt blaðsins að 14 hafi látist. Allir sem létust voru í fastasvefni þegar skjálftinn reið yfir og hús þeirra hrundu. Lögreglan segir að yfir 20 hafi látist en ekki hefur verið gefin út opinber tala yfir fjölda látinna.

AFP

• Blogga um frétt