Barn lést þegar jarðskjálfti af stærðinni 6,4 reið yfir eyjuna Mindanao á Filippseyjum í dag. Hús hrundu í skjálftanum, það kviknaði í verslunarmiðstöðvum og rafmagn fór af á stóru svæði.
Fólk flúði heimili og aðrar byggingar á eyjunni, þeirra á meðal verslunarmiðstöð í borginni General Santos sem stóð í ljósum logum skömmu eftir að skjálftinn reið yfir.
Barn lést þegar hús hrundi í bænum Datu Paglas og fjórir aðrir slösuðust þegar hús hrundi í nærliggjandi bæ. Þá leituðu um 20 manns læknis í bænum Magsaysay, í grennd við upptök skjálftans.
Samkvæmt frétt AFP voru ekki aðrar fréttir af mannfalli á eyjunni.
Samkvæmt upplýsingum frá Jarðvísindastofnun Bandaríkjanna átti skjálftinn upptök sín á aðeins 14 kílómeta dýpi, um 7,7 kílómetra frá borginni Columbio.
„Þetta er öflugasti jarðskjálfti sem ég hef upplifað,“ sagði Sara Duterte, borgarstjóri í Davao sem er stærsta borg á eyjunni, og dóttir Rodrigo Duterte forseta Fillipseyja.