Narraðar í klám

„Óskum eftir fallegum og tápmiklum stúlkum á háskólaaldri til að sitja fyrir á ljósmyndum og koma fram í myndböndum.“

Þannig hljóðaði auglýsing á vefsíðunni Craigslist sem fjöldi stúlkna í Kaliforníu brást við árið 2016. Erfitt er að lesa út úr orðalaginu að í raun og sann þyrftu svarendur að koma naktir fram og hafa kynferðislega tilburði í frammi fyrir framan mynda- og tökuvélarnar. Þegar á hólminn var komið var það þó akkúrat það sem aðstandendur auglýsingarinnar ætluðust til.

Íhuguðu að stytta sér aldur

Konurnar sem tóku þátt í gjörningnum voru allar á aldrinum átján til 23 ára, þegar efnið var tekið upp, og kom reynslan illa við sumar þeirra, sem einangruðust í framhaldinu félagslega og íhuguðu jafnvel að stytta sér aldur. Fyrir vikið leituðu þær réttar síns og í vikunni komst dómstóll í San Diego að þeirri niðurstöðu að brotið hefði verið á konunum. Dæmdi dómarinn 22 konum bætur upp á samtals einn og hálfan milljarð króna.

Ekki nóg með að konurnar hefðu verið leiddar í gildru. Dómurinn komst einnig að þeirri niðurstöðu að myndböndin, sem vefsíðan GirlsDoPorn framleiddi, hefðu verið sett á netið, þrátt fyrir að konurnar hefðu verið fullvissaðar um að það yrði ekki gert. Svæðisstöð CBS fullyrti fyrir helgina að sakborningarnir, þeirra á meðal Michael J. Pratt, framkvæmdastjóri GirlsDoPorn, og leikarinn Andre Garcia, ættu yfir höfði sér ákærur um kynlífsmansal. Samkvæmt sömu heimild situr Garcia inni ásamt fleirum en Pratt gengur laus.

Deilt á vinsælli síðu

Ef marka má fréttaveituna Courthouse var myndböndunum deilt á ákriftarvefsíðum GirlsDoPorn fáeinum vikum eftir að þau voru tekin upp og í framhaldinu á Pornhub, sem er ein vinsælasta síða þessarar gerðar í heiminum.
„Stefnendur hafa ekki enn þá bitið úr nálinni vegna málsins og hafa afleiðingarnar í mörgum tilvikum verið átakanlegar,“ segir í rökstuðningi dómarans, Kevins Enrights.

Nánar er fjallað um málið í Sunnudagsblaði Morgunblaðsins.