Átján látnir eftir að lest og rúta skullu saman

Hið minnsta átján eru látnir og fjörutíu slasaðir eftir að flutningalest og rúta skullu saman í nágrenni Bangkok, höfuðborgar Taílands, í dag.

Á myndbandi úr öryggismyndavélum, sem opinber stofnun hefur birt á netinu, má sjá rútuna mjaka sér yfir lestarteinana rétt áður en flutningalestin ekur fram hjá með þeim afleiðingum að hún skellur á fullri ferð inn í hlið strætisvagnsins.

Um fjörutíu manns voru fluttir á spítala, en nokkrum klukkustundum síðar höfðu yfir 30 verið útskrifaðir.

Taíland er í öðru sæti í heimi yfir þau ríki þar sem dauðsföll í umferðinni eru algengust miðað við íbúafjölda, samkvæmt tölum frá Alþjóðaheilbrigðismálastofnuninni. Ofsaakstur, akstur undir áhrifum áfengis og ófullburða löggæsla eru nefnd sem áhrifaþættir. Algengust eru slys mótorhjólamanna.

AFP

AFP

• Blogga um frétt