Eftirlitsstofnun flugfélaga í Bandaríkjunum hefur hafið rannsókn eftir að vélarhlíf á Boeing 737-800-farþegaflugvél datt af í flugtaki og slóst utan í væng vélarinnar.

Samkvæmt fréttastofu BBC er flugvélin er í eigu Southwest-flugfélagsins og var á leið frá borginni Houston til Denver í Bandaríkjunum árla morguns. 135 farþegar voru um borð ásamt sex starfsmönnum.

Flugvélaframleiðandinn hefur ítrekað ratað í heimspressuna að undanförnu vegna bilana á vélum þeirra. Til að mynda brotnaði hluti af skrokk Boeing-farþegaþotu Alaska Airlines eftir flugtak í janúar. Munaði litlu að fólk sogaðist út.

Frétt af mbl.is

Sonurinn sogaðist nærri út um gat flugvélarinnar

Yfirfara vélina

Southwest kvaðst ætla að láta viðhaldsteymi sitt yfirfara vélina eftir að vélarhlífin datt af og staðfesti að viðhald á vélinni væri á þeirra ábyrgð. Flugfélagið bað farþega sína velvirðingar á atvikinu og ítrekaði að öryggi þeirra sem og starfsmanna væri ávallt í fyrirrúmi. 

Vélin var framleidd árið 2015, samkvæmt flugsamgöngustofu Bandaríkjanna (FAA), en 737-800-gerðin er eldri kynslóð af nýjustu 737 Max-gerðinni. Vélin þar sem hluti af skrokknum brotnaði af var af þeirri gerð.

Boeing hefur neitað að tjá sig um atvikið og vísar spurningum til Southwest. 

Tengdar fréttir

Boeing

Hafnaði 400 milljón króna bónus

• Forstjóri Boeing víkur úr starfi
• „Sat þarna og starði á gatið allan tímann“
• Skemmdir í hreyflum raktar til sands
• Icelandair kláraði sérstaka skoðun á skrúfboltum

» Fleiri tengdar fréttir

• Blogga um frétt