19,6% starfsmanna Landspítalans hafa upplifað niðurlægjandi framkomu, hótanir eða ofbeldi af hálfu sjúklinga spítalans á síðustu 12 mánuðum, samkvæmt örkönnun um upplifun starfsmanna á óæskilegri hegðun innan vinnustaðarins, sem spítalinn framkvæmdi í desember. Niðurstöður könnunarinnar eru kynntar í frétt á vefsíðu Landspítala í dag.
1000 starfsmenn voru valdir af handahófi og spurðir um fjóra flokka óæskilegrar hegðunar sem fólk getur upplifað í starfi sínu og hvort þeir hefðu upplifað slíka hegðun síðustu 12 mánuði. Þá var spurt hver hefði sýnt af sér þessa tilteknu óæskilegu hegðun; sjúklingur, aðstandandi, samstarfsmaður eða stjórnandi.
13,2% þeirra sem svöruðu könnuninni höfðu upplifað niðurlægjandi framkomu, hótanir eða ofbeldi af hálfu samstarfsmanna sinna og 6% telja sig hafa orðið fyrir einelti af hendi samstarfsmanna á síðustu 12 mánuðum og 3% af hálfu stjórnanda.
4,7% starfsmanna sagðist hafa upplifað kynferðislega áreitni af hálfu sjúklinga á tímabilinu og 1,8% hafði orðið fyrir slíkri hegðun af hálfu samstarfsmanna á Landspítala.
Á vef Landspítala segir að sem betur fer hafi meirihluti starfsmanna ekki upplifað neina af þeim tegundum óæskilegrar hegðunar sem spurt var um á síðustu tólf mánuðum.