Lokað er um Fjarðarheiði milli Egilsstaða og Seyðisfjarðar vegna óveðurs. Þetta kemur fram í tilkynningu frá Vegagerðinni.
Þá er vakin athygli á því að mjög hvasst er undir Hafnarfjalli og mjög víða á Suður- og Suðvesturlandi. Hálkublettir eru á Hellisheiði og í Þrengslum en annars eru vegir á Suður- og Suðvesturlandi að heita má greiðfærir.
Á Vesturlandi eru vegir að mestu greiðfærir en hálkublettir eru á Fróðárheiði, á Bröttubrekku og á Holtavörðuheiði.
Á Vestfjörðum er snjóþekja, krapi eða hálkublettir á flestum fjallvegum en greiðfært á láglendi. Þæfingsfærð er á Kleifaheiði og á Mikladal en þungfært um Hálfdán.
Greiðfært er að mestu á Norðurlandi. Hálkublettir eru á Öxnadalsheiði og á Mývatnsöræfum.
Á Austurlandi er hálka á Möðrudalsöræfum og hálka og skafrenningur á Fagradal. Ófært er um Breiðdalsheiði og þungfært er um Öxi. Þæfingsfærð er á Vatnsskarði eystra.
Greiðfært er með suðausturströndinni.