Segir rafrænar kosningar spara ASÍ fúlgur

„Rafræna kerfið leysir meðal annars af hólmi dýrar bréfsendingar með kjörseðlum og umslögum sem áður voru sendar til félagsmanna,“ er haft eftir Magnúsi M. Norðdahl, deildarstjóra lögfræðideildar ASÍ, í tilkynningu vegna nýs kosningakerfis.

ASÍ hefur í samvinnu við Advania þróað rafrænt kosningakerfi og segir sparnaðinn hlaupa á tugum milljóna. „Það er þróað til að standast ýtrustu kröfur um leynd og persónuvernd. Við erum mjög sátt við framkvæmdina,“ segir Magnús en Drífa Snædal var kjörin forseti ASÍ á þingi sambandsins í dag.

Fleiri hafa notað kerfið og verður það meðal annars notað í formanns- og stjórnarkjöri hjá Neytendasamtökunum um helgina. Fjölmennustu kosningarnar sem hafa verið framkvæmdar með rafræna kerfinu voru kosning um Salek-samkomulagið þar sem 80 þúsund félagsmenn ASÍ voru á kjörskrá. 

Sigurður Másson, deildarstjóri hugbúnaðalausna Advania, segir að rafræn kosning auðveldi alla framkvæmd. „Búseta er engin hindrun í rafrænum kosningum og þær geta staðið yfir í lengri tíma en kjörstaðir geta yfirleitt verið opnir,“ segir Sigurður. Hann bætir við að kosningakerfið auki öryggi í kosningum vegna þess að atkvæði eru dulkóðuð.

• Blogga um frétt