Nýtt rammaskipulag fyrir hafnarsvæðið í Hafnarfirði verður kynnt í maí. Út frá því verður unnið nýtt deiliskipulag fyrir svæðið. Skipulagið verður unnið á grundvelli tveggja vinningstillagna í skipulagssamkeppni sem unnar voru af sænskum og hollenskum arkitektastofum (sjá kort). Munu stofurnar kynna sameiginlegt skipulag.
Nánar tiltekið er um að ræða Flensborgar- og Óseyrarsvæðið. Upphaflega stóð til að gera nýtt deiliskipulag fyrir Flensborgarhöfn. Skipulagssvæðið var síðan útvíkkað inn á land Óseyrar, vestan við Flensborgarhöfn, og að Suðurbakka.
Ólafur Ingi Tómasson, formaður skipulags- og byggingarráðs Hafnarfjarðar, segir að mögulega verði hægt að hefja framkvæmdir á næsta ári. Endurnýjun hafnarsvæðisins verði hugsanlega lokið 2030. Hluti skipulagssvæðisins er þó lengra kominn í undirbúningi. Þannig er áformað að hefja byggingu nýrra höfuðstöðva Hafrannsóknastofnunar með vorinu. Grunnur að þeim hefur þegar verið steyptur, að því er fram kemur í umfjöllun um áform þessi í Morgunblaðinu í dag.
Ólafur segir það auðvelda fyrirhugaða uppbyggingu að fáir eigendur séu að mannvirkjum og lóðum. Með uppbyggingunni verður byggð upp þjónusta við smábátahöfnina við Flensborgarkvosina.