Í umræðum um fjármálaáætlun 2020 til 2024 á Alþingi sagði fjármálaráðherra það vonbrigði að sjá rekstur WOW air stöðvast.
Ljóst væri að það þyrfti að taka það með í reikninginn fyrir bæði tekjur og útgjöld. Bjarni Benediktsson sagðist vænta þess að eiga um það gott samstarf með fjárlaganefnd.
Lokaumræða um fjármálaáætlun ríkisstjórnarinnar stendur nú yfir á þingfundi og er ekkert annað á dagskrá fundarins.
Í viðtali við mbl.is fyrr í dag sagði Bjarni að áhrif rekstrarstöðvunar WOW air verði nokkur og að stjórnvöld þurfi til að mynda að endurskoða tekjuáætlun sína sem og að gera ráðstafanir vegna aukins fjölda á atvinnuleysisskrá, en Bjarni segir að það verði til skamms tíma. „Það er ekki víst að tekjuáætlun okkar geti staðið óbreytt, við gætum þurft að endurskoða hana og mér finnst það mjög líklegt.“