Sjö Íslendingar í sóttkvínni á Tenerife
Setja bókamerki
Sjö Íslendingar eru meðal eitt þúsund gesta hótelsins H10 Costa Adeje Palace á Tenerife sem nú eru í sóttkví. Þetta staðfestir Þráinn Vigfússon, framkvæmdastjóri Vitaferða, við mbl.is.
Kórónuveiran greindist í einum gesti hótelsins í gær, en það er ítalskur læknir.
Hótelið er mjög vinsælt meðal breskra ferðamanna. Vitaferðir, Úrval-Útsýn og Heimsferðir eru meðal þeirra sem selja þar gistingu.
Þráinn segir að sjömenningarnir séu á vegum Vitaferða, en hann veit ekki til þess hvort fleiri Íslendingar séu á hótelinu. Segir hann að Vita muni fylgjast með stöðu mála og leiðbeiningum heilbrigðisyfirvalda. Segir hann þeirra að ákveða um framhaldið. Áformað er flug til Tenerife bæði í dag og á morgun samkvæmt Þráni.
Tómas J. Gestsson, framkvæmdastjóri Heimsferða, segir að enginn sé á hótelinu á vegum ferðaskrifstofunnar. Þórunn Reynisdóttir, framkvæmdastjóri Úrvals-Útsýnar, segir að unnið sé að því að afla upplýsinga frá hótelinu. Hún segjast jafnframt ekki vilja gefa upp hvort farþegar frá fyrirtækinu séu á hótelinu og vísa til þess að það séu persónuupplýsingar.
Lögregla stendur vörð við hótelið til að tryggja að enginn fari þangað inn eða út og ekki er svarað í síma á hótelinu. Maðurinn sem er með veiruna er í einangrun á sjúkrahúsi og verða sýni úr rannsókn á honum send til Madrid þar sem þau verða rannsökuð aftur líkt og reglur kveða á um á Spáni.
Strand skemmtiferðaskips kallar á erlenda aðstoð
Krefjast stöðvunar framkvæmda
Breytingar á skipulagi fréttadeildar RÚV
„Höfum ekki náð að skríða upp úr þeirri gryfju“
Telur forsendur fyrir vaxtalækkun
Banna mengandi búnað sem leyfður er á Íslandi
Bergnuminn í Hvalfirði