Bleikjurnar í Soginu vekja sífellt meiri athygli. Eftir að sleppingar hófust í landi Ásgarðs hefur stofninn dafnað þar og sífellt fleiri ná þeirri stærð sem veiðimenn dreymir. Nú hafa komið magnaðir dagar í bleikjuveiðinni í Soginu og þá veiðist ein og ein í yfirstærð.
Erik Koberling, sem í fyrra gerðist staðarhaldari í Blöndu, var að veiða í Ásgarði í dag og í gær. Hann setti í bleikju sem viðstaddir giskuðu á að væri um sjö pund. Sjálfur hafði hann ekki tök á að mæla hana, þar sem hann var staddur úti í miðri á þar sem hann landaði henni. En myndin sýnir svo glögglega hversu magnað eintak þessi bleikja er.
Hún tók hina klassísku púpu Pheasant Tail númer sextán. „Þetta eru svo sterkir fiskar og ég tókst á við hana í fimmtán til tuttugu mínútur. En ég er búinn að læra að veiða bleikju hér með félögum mínum og það er búið að vera frábært,“ sagði kátur Erik Koberling.
Með hlýnandi dögum hefur bleikjuveiðin glæðst á svæðinu og komið hafa dagar þar sem menn hafa verið að landa upp í þrjátíu fiskum. Nánast öll veiðin er á púpur og veitt andstreymis.
„Það var svo frábært, eftir allt þetta Covid að komast út og fara að veiða í rólegheitum og njóta íslenskrar náttúru. Ég var alveg í skýjunum. Svo vorum við líka að veiða vel. Flottar bleikjur og líka stóra urriða. Alger vítamínsprauta,“ sagði Erik í samtali við Sporðaköst nú síðdegis.
Þetta er samt ekki stærsta bleikja sem Erik hefur veitt. Hann fékk stærri fisk í Bíldsfellinu fyrir mörgum árum síðan. Bíldsfellið er svæðið á móti Ásgarði. Þá vissi Erik til þess að Þrastarlundasvæðið hafði verið að gefa fína veiði og einn félagi hans fékk þar fimm bleikjur í síðustu viku.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |