Allir vita að það er ákveðin kúnst að útbúa hleypt egg, bæði hvað varðar áferð, útlit og að eggjarauðan flæði fallega út þegar skorið er á eggið. Að horfa á stjörnukokkinn Gordon Ramsay að fullkomna hleypt egg er hreinn unaður. Ramsay deildi hinni fullkomnu aðferð til að útbúa hleypt egg á Instagram-reikningnum Masterclass sem vert er að horfa á og njóta. Síðan er vert að leika þetta eftir og athuga hvort aðferðin hans Ramsay dugar.
Hleypt egg
- 1 egg (best að vera með lífrænt egg frá landsnámshænum sem ganga lausar)
- vatn
- edik
- salt
Aðferð:
- Sjóðið fyrst vatn.
- Saltið örlítið og bætið síðan við ediki eftir smekk. Edikið hjálpar til við að styrkja eggjahvítuna og klæðir það hvítuna utan um eggjarauðuna.
- Hrærið varlega í vatninu bara þangað til þið fáið góða hreyfingu á vatnið.
- Takið eggið og brjótið það mjög varlega í litla glerskál. Glerskálin gerir það að verkum að auðvelt er að losa eggið rólega ofan í pottinn í sjóðandi vatnið.
- Takið glerskálina með egginu í og setjið eggið rólega ofan í sjóðandi vatnið.
- Það sem gerist síðan í framhaldinu er að eggjahvítan byrjar að umvefjast utan um eggjarauðuna og úr verður þetta fullkomna hleypta egg sem gerir það að verkum að það lítur næstum út eins og mozzarellakúla.
- Haldið vatninu enn á hreyfingu með suðu, passið að hafa milda og mjúka suðu á egginu og snúið síðan egginu á hvolf.
- Veiðið eggið varlega upp og setjið á eldhúspappír og þerrið örlítið.
- Lyftið síðan eldhúspappírnum og setjið eggið varlega í skeið og setjið ofan á t.d. ristað brauð eða english muffins sem er smurt kræsingum sem hugur ykkar girnist.
- Njótið, en hreinn unaður er að fá sér hleypt egg.
Hið fullkomna hleypta egg.
Skjátskot/Instagram