Ég held að flestir sem koma til mín í ráðgjöf, séu að einblína á að lausnin á fjárhagsvandanum liggi í að auka tekjurnar. Margir hafa verið í  basli í mörg ár, hafa reynt að auka tekjurnar með aukavinnu án þess að það sé að breyta stöðunni til batnaðar.  Þegar ástandið eru búið að vera erfitt í langan tíma og þú ert að upplifa að þú sért búinn að reyna allt þá virðist  þetta frekar vonlaus barátta.

Ástæðan fyrir því að dæmið er ekki að ganga upp er nefnilega sú að lausnin á fjárhagsvandanum liggur ekki í tekjunum.  Það er hægt að koma hlutunum í lag, jafnvel í árferði eins og núna, en þá verðum við að vera tilbúinn að horfa á hlutina frá öðru sjónarhorni. Vera tilbúinn að breyta hugsun okkar, ég veit að það er ekki auðvelt, en það er vel þess virði.

Viðbrögðin sem ég fæ þegar ég segi fyrst við fólk að lausnin liggi ekki í tekjunum, er í flestum tilfellum undrun í sambland við reiði. Hvernig mér detti í hug að segja annað eins. Það er skiljanlegt, þegar maður er búinn að berjast í langan tíma og trúa á eitthvað.  Svo kemur einhver og segir að lausnin liggi ekki þarna.

Okkur hefur flestum verið kennt að fjármál snúist um tekjur mínus gjöld og til að fjármálin gangi upp þá þurfi tekjurnar að vera hærri en gjöldin, alla vega ekki lægri. Þetta er rétt en málið er að þessi formúla sem flestir vinna með fjármál sín eftir er einungs örlítið brot af fjármálunum.  Þannig að ef þú ert að vinna eftir þessari formúlu að einblína á að hafa tekjurnar hærri til að geta staðið straum af útgjöldunum þá ertu á rangri leið, eða réttara þú ert ekki að taka veigamestu hlutina inní formúluna. Þú ert ekki að taka þá þætti inn sem munu gera þér kleift að upplifa draumana þína og njóta lífsins. Tilfinningin sem við erum að sækjast eftir varðandi góð fjármál er öryggi og sátt.

Til þess að upplifa öryggi og sátt, þurfum við að vera tilbúin að skoða nýjar leiðir, leggja af stað og taka ábyrgð. Vera tilbúin til að breyta hegðun okkar og hugsun, tilbúin að stíga út og heyra svörin sem við höfum óttast að heyra. Við komumst yfirleitt að því að svarið var betra heldur en við héldum, en það besta er að um leið og svarið er komið þá getum við lagt af stað og þá koma lausnirnar.