Leikkonan Heiða Rún Sigurðardóttir, betur þekkt sem Heida Reed, segir í nýrri færslu á Instagram að hún hafi allt frá 15 ára aldri verið dæmd út frá útliti sínu.
Heiða hefur slegið í gegn í sjónvarpsþáttunum Poldark. Áður en hún varð leikkona var hún fyrirsæta. „Verðleikar mínir hafa verið metnir út frá útliti mínu síðan ég var 15 ára. Það er meira en helmingurinn af lífi mínu. Ég komst aldrei á tískupallana, því jafnvel þó að ég hafi verið grennri þá en núna, þá voru mjaðmirnar of stórar fyrir tískuiðnaðinn,“ segir Heiða.
Hún segist sjá breytingu núna og hrósar meðal annars tónlistarkonunni Rihönnu fyrir nærfatalínu hennar Savage x Fenty.
„Ég er þakklát fyrir líkamann minn og hvernig ég lít út en ég hef barist við útlit mitt lengi. Lærin á mér hristast helling og ég er með svo miklu meiri appelsínuhúð en á þessari mynd. Ég á erfitt með að hafa reglu á æfingum, á erfitt samband við mat og ég er að vinna í því öllu. Það er sem mikilvægara er að ég vil vinna í því að taka sjálfa mig í sátt eins og ég er,“ segir Heiða.