Jamie O'Hara, fyrrverandi leikmaður enska knattspyrnufélagsins Tottenhams, gagnrýndi félagið harðlega á samfélagsmiðlinum Twitter í vikunni.
O'Hara, sem er 34 ára gamall, lagði skóna á hilluna á síðasta ári en hann er uppalinn hjá Tottenham og lék með félaginu frá 2003 til ársins 2011.
Tottenham hefur verið án stjóra síðan tímabilinu í ensku úrvalsdeildinni lauk í maí en liðið hefur átt í viðræðum við fjölda knattspyrnustjóra án árangurs.
„Hvað í fjandanum er í gangi hjá Tottenham,“ skrifaði O'Hara á Twitter.
„Þessi þjálfaraleit er til skammar. Hefur Daniel Levy [stjórnarformaður félagsins] einhverja hugmynd um hvað hann er að gera?
Þessi svokallaða þjálfaraleit er vandræðaleg og stjórnarformaðurinn hefur ekki hugmynd um hvernig hann á að taka félagið fram á við,“ bætti O'Hara við.