Martin Bjarni Guðmundsson og Jónas Ingi Þórisson náðu frábærum árangri á einu sterkasta unglingalandsliðamóti Evrópu í fimleikum, Junior Team Cup, eða Berlin cup, í dag.
Á mótinu keppa öll sterkustu drengjalandslið Evrópu og er mótið mikilvægur undirbúningur liðanna fyrir EM í Glasgow í ágúst.
Jónas og Martin tryggðu sér báðir sæti í úrslitum á stökki í gær, Martin í elsta flokknum og Jónas í 2. aldursflokki.
Þeir voru vel stemmdir fyrir úrslitin og gerðu stökkin sín frábærlega, svo vel að erfitt var að draga þá niður í einkunn. Þrátt fyrir frábær tilþrif andstæðinganna, dugði það ekki til.
Lokaeinkunn Martins var 13.700, 0.150 stigum á undan næsta manni, Umberto Zurtini frá Ítalíu. Lokaeinkunn Jónasar var 13.475, 0.475 sigum á undan Bora Tarhan frá Tyrklandi.