Íslenska kvennalandsliðið í handknattleik mætti Japan í vináttulandsleik í Svendborg í Danmörku í dag en leiknum lauk með sigri japanska liðsins, 25:22.
Japanska liðið byrjaði leikinn af miklum krafti og komst í 4:0 og það reyndist íslenska liðinu erfitt. Staðan að loknum fyrri hálfleik var 13:9 fyrir japanska liðið en íslenska liðinu tókst aldrei að minnka forskot Japana.
Lovísa Thompson var atkvæðamest í íslenska liðinu með 6 mörk, Arna Sif Pálsdóttir skoraði fimm mörk, Þórey Rósa Stefánsdóttir fjögur og Hrafnhildur Hanna Þrastardóttir þrjú. Steinunn Hansdóttir, Andrea Jacobsen, Ester Óskarsdóttir og Perla Ruth Albertsdóttir skoruðu svo sitt markið hver.