Þrettán milljónir fiska hurfu vegna bilunar

Þeir sem fylgjast með mælaborði fiskeldis á heimasíðu Matvælastofnunar ráku eflaust upp stór augu þegar allt í einu virtust hafa horfið um þrettán milljónir fiska úr íslensku fiskeldi. Matvælastofnun upplýsir í svari við fyrirspurn 200 mílna að um er að ræða villu í hugbúnaði fiskeldisfyrirtækja sem geri það að verkum að tölulegar upplýsingar hafi ekki skilað sér í kerfi stofnunarinnar.

Í mælaborðinu má sjá að í febrúar voru afföll 525.345 fiskar, 941.536 fiskum hafi verið slátrað og 47.654 fiskum fargað. Þá var fjöldi fiska í sjó 18.458.152.

Í mars voru samkvæmt mælaborðinu afföll 317.865, 156.437 fiskum var slátrað og engum fargað. Fjöldi fiska er hins vegar sagður aðeins 4.757.661. Augljóst er því að vantar um þrettán milljónir fiska.

Í mælaborði fiskeldis sást dramatískur samdráttur í fjölda fiska í íslensku fiskeldi. Skjáskot/Matvælastofnun

Matvælastofnun útskýrir að vegna bilunarinnar komu aðeins framleiðslutölur frá einu af fjórum stórum fiskeldisfyrirtækjum sem starfa á landinu í gegnum þau kerfi sem stuðst er við. Þau þrjú sem út af stóðu skiluðu vegna bilunarinnar framleiðslutölum í formi excel-skjala, en vegna þeirra kerfa sem unnið er með er ekki unnt að færa inn upplýsingarnar handvirkt í mælaborðið.

Matvælastofn kveðst vita til þess að unnið sé að lagfæringum á hugbúnaðinum sem um ræðir og eru bundnar vonir við að allt verði komið í eðlilegan farveg áður en langt um líður.

• Blogga um frétt