Björgunarbátar komu fiskibát til aðstoðar

Björgunarbátar voru kallaðir út í gær eftir að fiskibátur óskaði eftir aðstoð vegna þess að skipverjar höfðu fengið veiðifæri í skrúfuna og óskuðu þeir eftir drætti til lands.

Fiskibáturinn var staddur við Múlahraun á Faxaflóa, vestur af Akranesi, að því er segir í tilkynningu frá Slysavarnarfélaginu Landsbjörg. 

Það gekk vel að draga bátinn. Ljósmynd/Landsbjörg

Björgunarbátarnir Sjöfn og Stefnir frá Reykjavík og Kópavogi héldu út til aðstoðar klukkan 18 og klukkustund síðar voru björgunarbátarnir komnir að fiskibátnum. Vel gekk að toga bátinn, en skipstjóri fiskibátsins óskaði eftir því að báturinn yrði dreginn til hafnar í Keflavík þar sem talsverður afli var um borð sem þurfti að landa.

Sjöfn og Stefnir eru minni björgunarbátar og var því björgunarskipið Hannes Hafstein í Sandgerði kallað út til að draga fiskbátinn til Keflavíkur. Aðgerðin gekk vel og voru Hannes Hafstein og fiskbáturinn komnir til hafnar í Keflavík klukkan 23.

• Blogga um frétt