Bandaríkjaher segir að hjálpargögn séu tekin að berast á Gasasvæðið í gegnum bryggju sem var smíðuð til bráðabirgða.
„Um níuleytið í morgun (á Gasa-tíma) byrjuðu vörubílar með hjálpargögn að aka af stað í gegnum bráðabirgðabryggju á Gasasvæðinu,” sagði í yfirlýsingu frá hernum.
Fram kom einnig að engir bandarískir hermenn hefðu gengið á land.
„Þetta er fjölþjóðlegt verkefni til að flytja fleiri hjálpargögn til palestínskra borgara á Gasa í gegnum leið þar sem mannúðin er höfð að leiðarljósi,” sagði einnig í yfirlýsingunni.
Bryggjan var tilbúin til notkunar í gær og er búist við að um 500 tonn af hjálpargögnum verði flutt á palestínskt landsvæði á næstu dögum.