Þyrla Landhelgisgæslunnar sótti í morgun sjómann sem hafði slasast á hendi á fiskiskipi norðnorðaustur af Súgandafirði.
Útkallið barst um hálfníuleytið og var þyrlan komin á staðinn um klukkutíma síðar.
Maðurinn var hífður um borð í þyrluna við góðar aðstæður og var ölduhæðin lág.
Aðeins tók um átta mínútur frá því þyrlan kom á staðinn þangað til maðurinn var kominn um borð í hana, að sögn Ásgeirs Erlendssonar, upplýsingafulltrúa Landhelgisgæslunnar.
Sjómaðurinn var síðan fluttur á Landspítalann.