Sádiarabíska knattspyrnufélagið Al-Nassr vill fá Bruno Fernandes, miðjumann Manchester United, í sínar raðir.
ESPN skýrir frá þessu í dag en gangi þetta eftir yrðu Fernandes og landi hans Cristiano Ronaldo samherjar á nýjan leik.
Fernandes er samningsbundinn Manchester United til ársins 2026 en hann kom til félagsins frá Sporting í Portúgal árið 2020.
Áður hafði Manchester Evening News sagt að Bayern München og Inter Mílanó hefðu hug á að kaupa Fernandes af enska félaginu. The Athletic segir hins vegar að Portúgalinn vilji vera um kyrrt á Old Trafford.