Helstu sérfræðingar á sviði flugafgreiðslu eru nú staddir í Hörpu þar sem fram fer árleg ráðstefna Alþjóðasambands flugfélaga (IATA) um málefnið. Meðal frummælenda á ráðstefnunni er Willie Walsh, stjórnandi IATA og fyrrverandi forstjóri British Airways og Air Lingus.
Walsh segir aðspurður í samtali við ViðskiptaMoggann að flugafgreiðsla sé að jafnaði um 4-5% af kostnaði flugfélaga en eins og rætt er um á ráðstefnunni er sífellt verið að leita leiða til að auka skilvirkni í greininni til að ná kostnaðinum niður. Er þar meðal annars talað um hagnýtingu gagna og gervigreindar.
Eldsneyti er stærsti kostnaður í rekstri flugfélaga, um 30-31% að sögn Welsh. Þar á eftir komi starfsmannahald og flugafgreiðsla sem reyndar sé hluti af starfsmannahaldi hjá sumum flugfélögum, t.d. Icelandair.
„En þar sem þetta er ekki gert innan flugfélagsins þá er þetta um 4-5% kostnaðar,“ segir Walsh.
„Samanlagt eru starfsmannahald og eldsneyti 55-56% kostnaðar að jafnaði.“
Walsh gerði afkomu í fluginu að umtalsefni í erindi sínu á ráðstefnunni en framlegð (e. net margin) er nú 2,7%. Hæst fór hún á síðustu tíu árum í 5%. Jafn lág framlegð væri almennt óásættanleg í mörgum öðrum geirum að sögn Walsh.
Þá er eðlilegt að spyrja forstjórann hvað reki fólk í að stofna ný flugfélög.
„Það trúa margir að þeir geti gert þetta betur, en það átta sig ekki allir á hve erfitt það er.“
Lestu ítarlegt samtal við Walsh í ViðskiptaMogganum í dag.