Náðu tæplega sex tonnum á skömmum tíma

Starfsmenn veiðarfæragerðar Skinneyjar-Þinganess eru ánægðir með netin frá FISA í Perú. Vekja þeir athygli á að það hafi reynst vel í 210 millimetra pokanum á Þinganesi SF sem náði 5,9 tonnum af hágæða þorski á skömmum tíma.

Í færslu á Facebook-síðu veiðarfæragerðarinnar segir að þetta sé „einstaklega gott net sem hentar íslenskum aðstæðum einkar vel.“

Togarinn Þinganes er nú á veiðum rétt suðvestur af Rangársandi.

Þinganes hefur fiskað vel undanfarið og landaði síðast tæpum 69 tonnum 19. apríl. Þar af var 21,7 tonn af þorski, 20 tonn af ýsu, rúm 18 tonn af ufsa og tæp sjö tonn af karfa. Þar áður náði togarinn tæplega 91 tonni og var um 40 tonn þorskur, en 25,5 tonn karfi og tæp 18 tonn ufsi.

• Blogga um frétt