Mótmælendur kveiktu í McDonald's-veitingastað og slógust við lögreglu í útjaðri kröfugöngunnar í París í Frakklandi í dag. Talið er að um þúsund svartklædd ungmenni með grímur hafi gengið í kröfugöngu borgarinnar og meðal annars hrópað slagorð á borð við „Rístu upp París“ og „Allir hata lögregluna“.
Sumir eru sagðir hafa borið spjöld með merki anarkista og borða með tilvísun í öfga vinstri hópinn „svarta bandalagið“. Mótmælendur sem tilheyra hópnum eru oft í átökum við lögreglu, sérstaklega í kringum alþjóðlegar ríkjaráðstefnur.
Á leið kröfugöngunnar kveikti hópurinn í farartækjum og McDonald's-veitingastað ásamt því að skemma nærliggjandi fasteignir. Lögreglan beitti vatnsfallbyssum og táragasi í þeim tilgangi að reyna að tvístra hópnum. Að minnsta kosti tveir hafa verið handteknir.
Mikil óánægja og ólga er í Frakklandi vegna stefnu Emmanuel Macron, forseta Frakklands, um að gera umbætur á starfsemi hins opinbera, en verkalýðsfélögin vildu nýta daginn til þess að mótmæla áformum Macrons.