Eyðileggingin blasir við í Panama City í Flórída eftir að fellibylurinn Mikael kom á land í gær. „Líf fjölda fólks hefur breyst að eilífu. Fjölmargar fjölskyldur hafa misst allt sitt,“ sagði Rick Scott, ríkisstjóri í Flórída.
Að minnsta kosti tveir eru látnir en óttast er að þeir verði fleiri. Mikael var fjórða stigs fellibylur þegar hann kom að landi en mjög hefur dregið úr styrk hans þar sem hann fer yfir Karólínu-ríkin.
„Fellibylurinn var algjört skrímsli og við eigum enn eftir að átta okkur almennilega á eyðileggingunni,“ bætti Scott við. Hjálparsveitir aðstoða fólk en fjölmargir eru án vatns og matar.
VIDEO: Flooded homes and streets, toppled trees and power lines are seen in Panama City after Hurricane Michael tore through the city packing winds of 155 miles per hour (250 kilometers per hour) pic.twitter.com/jVDbKgVcNI
— AFP news agency (@AFP) October 11, 2018
Enn eru um 400 þúsund íbúar í Flórída án rafmagns en fellibylurinn er sá öflugasti sem skollið hefur á norðvesturhluta Flórída í heila öld.
Áður höfðu að minnsta kosti 13 látist í þremur ríkjum Mið-Ameríku þegar Mikael fór þar um. Sex í Hondúras, fjórir í Níkaragva og þrír í El Salvador. Yfir 370 þúsund íbúum Flórída var gert að yfirgefa heimili sitt áður en Mikael kom að landi en margir þeirra hunsuðu tilskipun yfirvalda.