Erlent | AFP | 28.1.2019 | 23:34 | Uppfært 29.1.2019 5:06

Verður stefnuræðan flutt 5. febrúar?

Nancy Pelosi, forseti fulltrúadeildar Bandaríkjaþings. AFP

Nancy Pelosi, forseti fulltrúadeildar Bandaríkjaþings, hefur sent Donald Trump Bandaríkjaforseta boð um að halda stefnuræðu sína á þriðjudaginn eftir viku, 5. febrúar. Pelosi fullyrðir að Trump hafi þekkst boðið en forsetinn hefur ekki tjáð sig um boðið, enn þá.

Trump greindi frá því á föstudag að hann hefði samþykkt fjárlög bandaríska ríkisins til næstu þriggja vikna og að þær alríkisstofnanir sem þá höfðu verið lokaðar í 35 daga myndu opna á ný og 800.000 starfsmenn, sem hafa verið launalausir síðan, fengju nú greidd laun.

Frétt af mbl.is

Hvernig Pelosi trompaði Trump

Upphaflega stóð til að Trump flytti stefnuræðuna í lok janúar, venju samkvæmt, en Pelosi sagði Trump að fresta ræðunni þar til deilan leystist. Hann sagði nei og skoraði á hana að neita honum um tækifærið. Pelosi gerði nákvæmlega það er hún meinaði forsetanum að flytja ræðuna af öryggisástæðum.

Pelosi fullyrðir að Trump hafi þekkst boðið um að flytja stefnuræðu sína 5. febrúar en ekkert hefur heyrst frá forsetanum enn þá. AFP

Ef Trump mun í raun og veru flytja ræðuna 5. febrúar verða einungis tíu dagar í að nýsamþykkta fjárlagafrumvarpið renni út. Í því er hvergi minnst á greiðslur fyrir múrinn á landamærum Bandaríkjanna og Mexíkó svo ljóst er að deilumálið sem olli lokunum alríkisstofnunum fyrir áramót verður aftur orðið helsta þrætuepli bandarískra stjórnmála innan nokkurra daga.