Allir mótmælendur í Bagdad í Írak sem höfðu safnast saman fyrir framan bandaríska sendiráðið í Írak yfirgáfu svæðið í dag. „Við brenndum þá,“ heyrðist í mótmælendunum um leið og þeir yfirgáfu svæðið fyrir framan sendiráðið.
Fyrr í dag fyrirskipuðu forsvarsmenn hernaðarsamtakanna Hashed al-Shaabi stuðningsmönnum sínum að yfirgefa sendiráð en þeir voru tregir að verða við þeim óskum og neituðu í fyrstu að fara.
Fólkið mótmælti mannskæðum loftárásum Bandaríkjahers á yfirráðasvæði Hashed í Írak. Sendiráðið var rýmt eftir að mótmælendur réðust að því.
Tjöldum og grindverkum var safnað saman sem mótmælendur höfðu meðferðis fyrir framan sendiráðið.