„Þetta var öflugur flugeldur og það var mikil mildi að þarna fór ekki verr,“ segir Kristinn Ólafsson, framkvæmdastjóri Bandalags íslenskra skáta, um flugeldaslysið við skátaskálann Þrist, í Þverárdal undir Móskarðshnjúkum í gær. Galli í flugeldinum varð til að hann sprakk á jörðu niðri. Kristinn segir krakkana hafa brugðist hárrétt við eftir að plaststykki skutust út í loftið við sprenginguna með þeim afleiðingum að einn unglingurinn missti meðvitund.
13 krakka hópur á aldrinum 16-17 ára var í árlegri áramótaútilegu í skálanum þegar óhappið varð. Skátaforingjarnir fimm sem voru með í för og eru um tvítugt kölluðu til sjúkrabíl sem flutti tvö ungmenni á sjúkrahús. Fimm til viðbótar fóru svo í kjölfarið með foreldrum sínum á slysavarðstofuna.
Kristinn segir meiðslin hafa verið minni háttar, allir hafi verið útskrifaðir af sjúkrahúsinu í gærkvöldi. Flugeldinn segir hann hafa verið svokalla miðnæturbombu eða þriggja tommu flugeld sem séu afar öflugir.