Falleg friðarganga

Árleg friðarganga á Þorláksmessu fór fram á þremur stöðum á landinu í dag. Í Reykjavík var safnast saman á Laugavegi neðan Snorrabrautar og gengið af stað klukkan 18. Hamrahlíðarkórinn og kór Menntaskólans við Hamrahlíð gengu fremst og sungu viðeigandi lög.

Í göngulok var stuttur fundur á Austurvelli þar sem Drífa Snædal, forseti ASÍ, flutti ávarp og Eyrún Ósk Jónsdóttir skáld las friðarljóð. Fundarstjóri var Daníel E. Arnarsson, framkvæmdastjóri Samtakanna 78. 

Á sama tíma var friðarganga á Ísafirði en á Akureyri hófst gangan kl. 20.