Innlent | mbl | 27.7.2022 | 20:14 | Uppfært 21:41

„Lögregluþjónar voru á verði með MP5-byssur“

Allir 266 farþegarnir voru færðir í skýli þar sem að lögregluþjónar voru á verði með MP5-byssur að sögn farþegans. Ljósmynd/Aðsend

„Það var leitað á öllum farþegunum og síðan vorum við færð í skýli þar sem lögregluþjónar voru á verði með MP5-byssur,“ tísti farþegi úr flugvélinni sem var snúið við á miðri leið frá Fankfurt í Þýskalandi til Seattle í Bandaríkjunum og lenti á Keflavíkurflugvelli vegna sprengjuhótunar fyrr í vikunni.

Frétt af mbl.is

Segir ringulreið hafa gripið um sig í flugvélinni

Frétt af mbl.is

Flugvél snúið við vegna sprengjuhótunar

mbl.is hafði samband við manninn sem er fyrrum flugvélaverkfræðingur og fékk leyfi frá honum til að nota myndirnar sem hann lét fylgja með tístinu sínu.

MP5-byssurnar sem maðurinn segir að lögreglan hafi borið eru hríðskotabyssur.

Í tístinu segir farþeginn að hann hafi ekki fengið neinar upplýsingar frá flugfélaginu Condor um ástæðuna fyrir því að flugvélin hafði lent á Íslandi.

Þá segir hann að upprunalega ástæðan sem þau fengu frá Condor hafi verið að klósettin í flugvélinni væru biluð. Að hans sögn fréttu farþegar raunverulegu ástæðuna, sprengjuhótun, fyrst þegar að þau sáu hana í fréttunum.

Allir farþegar flugvélarinnar þurftu að skilja eftir handfarangur sinn á flugbrautinni en lögreglan leitaði í öllum farangrinum. Ljósmynd/Aðsend

Tekin mynd af öllum farþegunum

Að sögn farþegans voru allir 266 farþegar vélarinnar færðir í skýli á flugvellinum þar sem voru tvö klósett voru fyrir alla farþegana. Lögreglan tók þá mynd af öllum farþegum vélarinnar og var þeim gert að bíða í skýlinu í meira en klukkutíma að sögn farþegans.

Hann tekur fram að eftir að lögreglan hafði lokið við að leita í öllum farangrinum hafi farþegum verið komið í rútu og þeim skutlað á hótel. Maðurinn segir að þeim hafi ekki verið boðið neitt að borða eftir að þau höfðu yfirgefið Leifsstöð.