Sheffield United vill kaupa sóknarmanninn Rhian Brewster af Liverpool en Chris Wilder, knattspyrnustjóri United, staðfesti þetta á blaðamannafundi sínum í dag.
Brewster er einungis tvítugur að aldri en fjölmörg lið í ensku úrvalsdeildinni hafa spurst fyrir um leikmanninn að undanförnu. „Ég ætla ekki að halda því fram að við séum ekki að skoða hann,“ sagði Wilder en hann var að ræða við blaðamenn fyrir leikinn gegn Aston Villa í úrvalsdeildinni á mánudaginn. „Félögin eru að ræða saman, þetta er í höndum yfirmanna minna núna,“ bætti hann við en Liverpool er sagt tilbúið að selja Brewster fyrir um 20 milljónir samkvæmt Sky Sports.
Framherjinn lék sem lánsmaður hjá Swansea á seinni hluta síðasta tímabils í ensku B-deildinni. Þar skoraði hann ellefu deildarmörk í 21 byrjunarliðsleik. Hann er af mörgum talinn eitt mesta efnið í enskum fótbolta en hann varð markahæsti leikmaður á HM U17 þegar enska liðið varð heimsmeistari á Indlandi.