Lætur fyrrverandi vinnuveitendur heyra það

Fyrrverandi knattspyrnustjórinn Louis van Gaal er ekki sáttur við sitt fyrrverandi félag Ajax í Hollandi. Van Gaal stýrði liði Ajax á árunum 1991 til ársins 1997. Liðið varð þrívegis hollenskur meistari undir stjórn van Gaals og þá varð það Evrópumeistari árið 1995. Van Gaal stýrði síðast liði Manchester United á árunum 2014 til 2016 en hefur ekki þjálfað síðan.

Marc Oversmars, yfirmaður íþróttamála hjá Ajax, hefur kallað eftir því að keppni í hollensku úrvalsdeildinni aflýst vegna kórónuveirunnar. Fari svo verður Ajax að öllum líkindum krýnt meistari líkt og Club Brugge í Belgíu en Belgar tóku þá ákvörðun að aflýsa sinni deildarkeppni í vikunni.

„Það þarf að klára keppni þegar kórónuveiran hefur verið lögð að velli i Evrópu,“ sagði van Gaal við hollenska fjölmiðla. „Í íþróttum eiga úrslitin að ráðast á vellinum. Ajax hefur ekkert unnið eftir 25 deildarleiki. Ríkisstjórnin hefur fylgt tilmælum sérfræðinga frá því að veiran komst á skrið og núna þykjast knattspyrnufélögin allt í einu vita betur.

Allt í einu er bara enginn möguleiki að klára deildarkeppninnar samkvæmt Ajax og þá á bara að slaufa öllu og krýna þá væntanlega meistara! Félög sem reyna að nýta sér ástandið í heiminum í dag get ég ekki sætt mig við. Sérstaklega þegar þeir tala um heilsu fólks sem einhverja ástæðu fyrir því að það eigi að hætta leik,“ bætti stjórinn við.

• Blogga um frétt