Ánægjulegast að sjá smáan humar
Setja bókamerki
Tengdar fréttir
Humarveiðar
„Humarveiðin fer betur af stað en við þorðum að vona og ánægjulegast er að sjá líka smáan humar í aflanum,“ segir Sverrir Haraldsson, sviðsstjóri botnfisksviðs Vinnslustöðvarinnar í Vestmannaeyjum, í færslu á vef fyrirtækisins.
„Hrun humarstofnsins stafaði af bresti í nýliðun og vonandi boðar þessi smáhumar betri tíð fyrir stofninn. Látum samt vera að draga víðtækar ályktanir af slíkum vísbendingum,“ segir hann. Vinnslustöðin fer með um 19% af aflamarki í humri og er því humarkvóti félagsins 30 tonn á þessu fiskveiðiári.
Veiðisvæðin hefðbundin
Humarstofninn hefur staðið höllum fæti um nokkurt skeið og hefur útgefinn humarkvóti verið lækkaður töluvert og það litla aflamark sem gefið er út, 143 tonn, veitt til að halda áfram veiðum í tilraunaskyni og meta ástand stofnsins.
Hafrannsóknastofnun lækkaði í janúar stofnmatið um 27%. Það er því óhætt að segja að þeir sem hafa stundað humarveiðar hafi ekki haft miklar væntingar til veiða ársins, enda nam heildaraflinn 2.250 tonnum fyrir um áratug eða tæplega fimmtánfalt meira.
Skip Vinnslustöðvarinnar, Drangavík VE og Brynjólfur VE, héldu til humarveiða í apríl og hafa landað í tvígang. Á vef útgerðarinnar er greint frá því að „veiðisvæðin eru hefðbundin í upphafi vertíðar, á Breiðamerkurdýpi og Hornafjarðardýpi. Ef að líkum lætur færist sóknin vestar þegar kemur fram í júní en mest hefur verið veitt á svæðinu við Eldey undanfarin ár.“ En veiðar hafa verið bannaðar í Jökuldýpi og Lónsdjúpi.
Tilraunaveiðar með gildrur í Breiðafirði hófust í fyrra á Imgu P SH. Sverrir gerir ráð fyrir að Inga P SH verði gerð á ný út á vegum Vinnslustöðvarinnar til slíkra humarveiða.
„Inga P er í slipp sem stendur en við stefnum að því að taka upp þráðinn frá því í fyrrahaust þegar gildruveiðarnar á Breiðafirði skiluðu árangri framar vonum. Þær gengu vel og áhugavert er að þreifa sig áfram til að ná góðum tökum á þessum veiðiskap.“
Tengdar fréttir
Humarveiðar
Rampur númer 1.100 vígður í dag
Allar líkur á að Seðlabankinn lækki næst vexti
Fyrsta 360 gráða yfirlitsmyndin frá goslokum
Sleppt úr varðhaldi: Búið að klippa kanta á seðlum
Mútuðu japanskri mafíu
Skuldahalinn lengist í Reykjavík
Eldgosinu lokið en getum búist við öðru
„Miklar líkur á rýmingu á næstu sólarhringum“
